ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានថ្លែងឱ្យដឹងថា កម្ពុជាបច្ចុប្បន្នខ្ចីប្រាក់ពីក្រៅប្រទេសជាប្រចាំឆ្នាំមិនស្មើ ២០ភាគរយនៃថវិកាជាតិសរុបនោះឡើយ។

សម្តេចថ្លែងឱ្យដឹងបែបនេះនៅក្នុងពិធីប្រកាសដាក់ឲ្យអនុវត្តចក្ខុវិស័យ និងយុទ្ធសាស្ត្រ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ (២០២៣-២០២៧) នៅសណ្ឋាគារសុខាភ្នំពេញ នាព្រឹកថ្ងៃទី២០ ខែមីនា ឆ្នាំ២០២៣។

សម្តេចនាយករដ្ឋមន្ត្រីបានរំលឹកពីអតីតកាល ៣០មុន ចំណូលក្នុងស្រុកដែលកម្ពុជារកបានដោយខ្លួនឯងមានត្រឹមតែ ១ភាគ៣នៃថវិកាជាតិសរុប។

សម្តេចថ្លែងថា៖ «តម្រូវការប្រមាណ ២ភាគ៣ នៃថវិកាជាតិ ត្រូវបានដោះស្រាយដោយប្រភពធនធានជាជំនួយហិរញ្ញុវត្ថុពីក្រៅប្រទេស។ នេះជាលទ្ធផលជាក់ស្តែងដែលយើងសម្រេចបាន ស្របតាមគោលជំហដឹកនាំដែលបានប្រកាសជាសាធារណៈនាពេលកន្លងទៅគឺកែទម្រង់រស់ គឺមិនកែទម្រង់ស្លាប់»។

បើតាមសម្តេច ទស្សនៈដឹកនាំ រួមទាំងសមិទ្ធផលជាក់ស្តែងនៃកិច្ចការកែទម្រង់ បានធ្វើឱ្យក្តីរំពឹងទុកលើការកសាងប្រជាជាតិត្រូវបានចារឹកទុកក្នុងបទកថារដ្ឋធម្មនុញ្ញឆ្នាំ១៩៩៣ ក្លាយទៅជាការពិតនោះគឺ ការទទួលខុសត្រូវខ្ពស់ចំពោះវាសនាអនាគតជាតិឱ្យរីកចម្រើនលូតលាស់ និងកែប្រែកម្ពុជាទៅជាកោះសន្តិភាព៕

^{PHOTO: KOK KY}